ನಿರೀಕ್ಷೆ

ಕಣ್ಣ ಜ್ಯೋತಿ ಆರಿಹೋಗುವ ಮುನ್ನ

ನನ್ನ ನಾನೇ ಮರೆತು ಹೋಗುವ ಮುನ್ನ 

ನಾನು ನಾನಾಗಿ ಬೆಳಗಬೇಕಿದೆ ಒಮ್ಮೆ

ದೊರೆವುದೆ ಆ ಒಂದು ದಿನ?

ಮಗಳು, ಮಡದಿ, ಮಾತೆ ಎಂಬ ಹೆಮ್ಮೆ ಇದೆ ನನಗೆ

ಆದರೂ ಆ ಬಿರುದುಗಳ ಕಳಚಿಟ್ಟು 

ನಾನು ನಾನಾಗಿ ಬಾಳಬೇಕೆಂಬ ಆಸೆ 

ಒದಗಿಬರುವುದೇ ಆ ಒಂದು ಸುದಿನ!

ಶ್ರಮರಹಿತಳಾಗಿ , ತ್ಯಾಗರಹಿತಳಾಗಿ

ಯಮನಪಾಶ ಬೀಳುವ ಮುನ್ನ, ನನ್ನಾತ್ಮಸಾಕ್ಷಿಯಂತೆ

ನಾನು ನಾನಾಗಿ ಒಂದೇ ಒಂದು ದಿನ

 ನಾ ಬಯಸಿದಂತೆ  ಬದುಕಬೇಕಿದೆ ನನಗೆ

ಬರುವುದೇ ಆ ದಿನ?

ಬಾಳನಾಟಕಕೆ ಪರದೆ ಬೀಳುವ ಮುನ್ನ

ಎಲ್ಲ ಪಾತ್ರಗಳ ಮುಖವಾಡ ಕಳಚಿ

ನಾನು ನಾನಾಗಿ ನನ್ನನ್ನೇ ಮರೆಯುವಂತೆ

ನಿರ್ವಹಿಸಬೇಕಿದೆ ನನ್ನಿಚ್ಛೆಯ ಪಾತ್ರ

ದೊರಕುವುದೇ ಆ ಒಂದು ಅವಕಾಶ?