ಹಾರುವ ತಟ್ಟೆಗಳು ಅಥವಾ ವಸ್ತುಗಳ ಬಗ್ಗೆ ವದಂತಿಗಳು, ಅಂತೆಕಂತೆಗಳು – ಎಲ್ಲವನ್ನೂ ಹಲವು ಬಾರಿ ಕೇಳಿದ್ದೇವೆ. ಅತೀಂದ್ರಿಯವಾದ ಅಂತಹವುಗಳನ್ನು ನಂಬುತ್ತೇವೋ ಇಲ್ಲವೋ ಎಂಬುದು ಬೇರೆ ವಿಷಯ; ಆದರೆ ವೈಜ್ಞಾನಿಕವಾದ ಅಂತಹ ಯಂತ್ರಗಳು ಈಗಾಗಲೇ ಹಲವು ರೀತಿಗಳಲ್ಲಿ ಬಳಕೆಗೆ ಬಂದಿವೆ.
ಮಾನವನನ್ನು ಹೊತ್ತೊಯ್ಯುವ ವಿಮಾನಗಳೂ ಹೆಲಿಕಾಪ್ಟರ್ಗಳೂ ಅತ್ಯಂತ ದುಬಾರಿಯ ವಸ್ತುಗಳು. ಸಾಮಾನ್ಯರ ಕೈಗೆ ಅವು ಗಗನಕುಸುಮಗಳೇ. ಆದರೆ ಇದೀಗ ರಿಮೋಟ್ ಮೂಲಕ ನಿಯಂತ್ರಿಸಬಹುದಾದ ’ಡ್ರೋನ್’ಗಳು ತಮ್ಮ ಹೆಜ್ಜೆ ಗುರುತನ್ನು ಎಲ್ಲೆಡೆ ಮೂಡಿಸಲಾರಂಭಿಸಿವೆ.
ತನ್ನಿಂದತಾನೇ ಹಾರಾಡುವ ’ಡ್ರೋನ್’ಗಳು ಹಲವು ರೀತಿಗಳಲ್ಲಿ ಜನಜೀವನದ ಭಾಗವಾಗಿ ಸೇರಿಕೊಳ್ಳುವ ದಿನ ದೂರವಿಲ್ಲ. ಈಗಾಗಲೇ ಹಲವು ರೀತಿಯ ಸಂಶೋಧನೆಗಳಿಗೆ ಒಳಪಟ್ಟಿರುವ ಈ ಹಾರುವಯಂತ್ರಗಳು ಮನೆಬಾಗಿಲಿಗೆ ಲಗ್ಗೆಹಾಕಲಿವೆ.
ಹಾರುವ ಛಾಯಾಗ್ರಾಹಕಗಳಾಗಿ
ವಿಸ್ತಾರವಾಗಿರುವ ಪ್ರದೇಶದ ಯಾವುದೇ ಒಂದು ದೃಶ್ಯ ಬೇಕಾದಾಗ ಪಕ್ಷಿನೋಟ ಎಂಬ ಪದವನ್ನು ಪ್ರಯೋಗಿಸುತ್ತೇವೆ. ಅದೇ ನೋಟವನ್ನು ಹಾರುವ ಕ್ಯಾಮೆರಾಗಳು ನಮಗೆ ಸೆರೆಹಿಡಿದು ನೀಡುವುದು ಈಗ ಜನಪ್ರಿಯವಾಗುತ್ತಿರುವ ಒಂದು ತಂತ್ರಜ್ಞಾನ. ಎತ್ತರದ ಕಟ್ಟಡಗಳಿಗೆ ಹತ್ತಿ ಛಾಯಾಗ್ರಹಣ ಮಾಡುವ ಬದಲು ನೆಲದಿಂದಲೇ ನಿಯಂತ್ರಿಸಬಹುದಾದ ಹಾರುವ ಕ್ಯಾಮೆರಾಗಳು ಇನ್ನಷ್ಟು ವಿಹಂಗಮನೋಟವನ್ನು ನೀಡುತ್ತವೆ.
ಗಸ್ತು
ಹಾರುವ ಕಾವಲುಗಾರ ಯಂತ್ರಗಳನ್ನು ತುಂಬ ಜನ ಸೇರುವ ಕಾರ್ಯಕ್ರಮಗಳಲ್ಲಿ ಸುರಕ್ಷತೆಗಾಗಿಯೂ ಬಳಸಲಾಗುತ್ತಿದೆ. ಪೊಲೀಸರು ತಮ್ಮ ಗಸ್ತುವೀಕ್ಷಣೆಗೆ ಕೂಡ ಹಾರಾಡುವ ಸಿಸಿ ಕ್ಯಾಮೆರಾಗಳಾಗಿ ಡ್ರೋನ್ ಬಳಸಲು ಆರಂಭಿಸಿದ್ದಾರೆ. ಮಿಲಿಟರಿ ಕ್ಷೇತ್ರಗಳಲ್ಲೂ ಡ್ರೋನ್ಗಳು ಗಣನೀಯ ಸಹಕಾರ ನೀಡುತ್ತಿವೆ.
ಕೃಷಿ
ಹಲವು ಎಕರೆಗಳಷ್ಟಿರುವ ಕೃಷಿಪ್ರದೇಶಗಳಲ್ಲಿ ನಿತ್ಯವೂ ಹೋಗಿ ದೈನಂದಿನ ಚಟುವಟಿಕೆಗಳನ್ನು ನಡೆಸುವುದು ಕಷ್ಟದಾಯಕ. ಔಷಧ ಸಿಂಪಡಣೆ, ಹೊಲ-ತೋಟಗಳ ಕಾವಲು, ಉಸ್ತುವಾರಿ ಇತ್ಯಾದಿಗಳನ್ನು ಡ್ರೋನ್ಗಳೇ ನಿರ್ವಹಿಸುವ ದಿನ ಬರಲಿದೆ. ನಿಮ್ಮ ಹೊಲದಲ್ಲಿ ನಡೆಯುವ ಚಟುವಟಿಕೆಗಳನ್ನು ನೀವು ಮನೆಯಿಂದಲೇ ನೋಡುತ್ತಿರಬಹುದು.
ಹೋಮ್ ಡೆಲಿವರಿ
ಆನ್ಲೈನ್ನಲ್ಲಿ ಬುಕ್ಮಾಡಿದ ವಸ್ತುಗಳನ್ನು ಈಗ ಸಾಮಾನ್ಯವಾಗಿ ವಾಹನಗಳ ಮೂಲಕ ರವಾನಿಸಲಾಗುತ್ತದೆ. ಆದರೆ ಇನ್ನುಮುಂದೆ ನೀವು ಆರ್ಡರ್ ಮಾಡಿದ ವಸ್ತುಗಳು ಗಾಳಿಯಲ್ಲಿ ತೇಲಿಕೊಂಡು ನಿಮ್ಮ ಮನೆಬಾಗಿಲಿಗೆ ಬಂದರೆ ಆಶ್ಚರ್ಯಪಡುವ ಅಗತ್ಯವಿಲ್ಲ. ಹೀಗೊಂದು ಚಿಂತನೆಯನ್ನು ಅಮೆಜಾನ್ ನಡೆಸಿದೆ. ಡ್ರೋನ್ ಮೂಲಕ ವಸ್ತುಗಳನ್ನು ರವಾನಿಸಲು ನಿರ್ಧರಿಸಿದ್ದು, ಕೇಂಬ್ರಿಜ್ನಲ್ಲಿ ಈಗಾಗಲೇ ಪ್ರಯೋಗಾತ್ಮಕ ಪರೀಕ್ಷೆ ನಡೆಸಿ ಯಶಸ್ವಿಯಾಗಿದೆ. ಇದನ್ನು ’ಏರ್ಬೋರ್ನ್ ಫುಲ್ಫಿಲ್ಮೆಂಟ್ ಸೆಂಟರ್’ ಎಂದು ಅಮೆಜಾನ್ ಕರೆದುಕೊಂಡಿದೆ. ಈ ವಾಯುನೌಕೆ ೪೫ ಸಾವಿರ ಅಡಿ ಎತ್ತರದಲ್ಲಿ ಹಾರಾಟ ನಡೆಸಿ ವಸ್ತುಗಳನ್ನು ವಿತರಣೆ ಮಾಡುತ್ತದೆ.
ಸಮೀಕ್ಷೆ
ಯಾವುದೇ ಪ್ರಕೃತಿವಿಕೋಪಗಳ ಸಂದರ್ಭದಲ್ಲಿ ನ?ದ ಅಂದಾಜಿಗಾಗಿ ಸಮೀಕ್ಷೆಗಳಿಗೆ ಕೂಡ ಇಂತಹ ಡ್ರೋನ್ಗಳನ್ನು ಬಳಸಬಹುದು.
ರೈಲ್ವೇಟ್ರ್ಯಾಕ್ ಮೇಲೆ ಕಾಂಕ್ರೀಟ್ ಚಪ್ಪಡಿಗಳನ್ನು ಇಡುವ ಬಂಡಾಯಗಾರರ ಗುಂಪು ನಡೆಸಿದ ಪ್ರಯತ್ನವನ್ನು ರೈಲ್ವೇ ರಕ್ಷಣಾಪಡೆಯು ಡ್ರೋನ್ ಕ್ಯಾಮೆರಾ ಬಳಸಿ ಕಣ್ಗಾವಲು ನಡೆಸುವ ಮೂಲಕ ತಡೆಯುತ್ತಿದೆ. ನೂತನ ರೈಲ್ವೇಟ್ರ್ಯಾಕ್ ಬಗ್ಗೆ ಸಮೀಕ್ಷೆ ನಡೆಸಲು ಹಾಗೂ ಟ್ರ್ಯಾಕ್ಗಳಲ್ಲಿನ ತೊಂದರೆ ನಿವಾರಣೆಯಲ್ಲಿಯೂ ಇವುಗಳೇ ಸಹಕರಿಸಲಿವೆ.
ನಕ್ಷೆ ತಯಾರಿಕೆಯಲ್ಲಿ
ಭೂಮಿಯ ನಿಖರವಾದ ಉದ್ದ, ಅಗಲಗಳನ್ನು ತಿಳಿದು ಯಾವುದೇ ರೀತಿಯ ನಕ್ಷೆ ತಯಾರಿಸುವಲ್ಲಿಯೂ ಡ್ರೋನ್ಗಳ ಬಳಕೆ ಸಹಕಾರಿಯಾಗುತ್ತದೆ. ಯುದ್ಧದಲ್ಲಿ, ಪತ್ರಿಕೆವಿತರಣೆಯಲ್ಲಿ ಹೀಗೆ ಅನೇಕ ರೀತಿಯಲ್ಲಿ ಡ್ರೋನ್ಗಳು ಬಳಕೆಯಾಗಲಿವೆ.
ಈಗ ಕಲಾವಿದನಾಗಿಯೂ ಡ್ರೋನ್ ಬಳಕೆಯಾಗುತ್ತಿದೆ! ಬಣ್ಣ ಬಳಿಯುವುದು, ಉಬ್ಬುಶಿಲ್ಪಗಳನ್ನು ರಚಿಸುವುದರಲ್ಲಿಯೂ ಈ ‘ಯಂತ್ರ ಕಲಾವಿದ’ ಬಳಕೆಯಾಗುತ್ತಿದೆ. ಕೆನಡಾದ ಮಾಂಟ್ರಿಯಲ್ನಲ್ಲಿರುವ ಮೆಕ್ಗಿಲ್ ವಿಶ್ವವಿದ್ಯಾಲಯದ ಕಂಪ್ಯೂಟರ್ ವಿಜ್ಞಾನ ವಿಭಾಗದ ಪೌಲ್ ಕ್ರಾಯಿಸ್ ಪ್ರಯೋಗಾಲಯದ ಪ್ರೊ. ಕ್ರೈ ಮತ್ತು ಅವರ ಕೆಲವು ವಿದ್ಯಾರ್ಥಿಗಳು ‘ಕಲಾವಿದ ಡ್ರೋನ್’ ರೂಪಿಸಿದ್ದಾರೆ. ಟಿವಿ ಚಾನೆಲ್ಗಳಲ್ಲಿ ನೇರಪ್ರಸಾರಕ್ಕೂ ಡ್ರೋನ್ ಕ್ಯಾಮೆರಾಗಳು ಸಹಕಾರಿಯಾಗಲಿವೆ.
ಹೇಗೆ ಕಾರ್ಯ ನಿರ್ವಹಿಸುತ್ತವೆ?
ಡ್ರೋನ್ಗಳ ಮೇಲ್ಭಾಗಗಳಲ್ಲಿ ನಾಲ್ಕು ಮೂಲೆಯಲ್ಲಿಯೂ ಫ಼್ಯಾನ್ಗಳಿರುತ್ತವೆ. ಅವು ಗಾಳಿಯನ್ನು ಕೆಳಕ್ಕೆ ತಳ್ಳುವ ಮೂಲಕ ಮೇಕ್ಕೇರುವ ಒತ್ತಡ ನಿರ್ಮಿಸಿಕೊಳ್ಳುತ್ತವೆ. ದೂರದಲ್ಲಿರುವ ರಿಮೋಟ್ ಮೂಲಕ ಅವುಗಳ ವೇಗ ಹಾಗೂ ದಿಕ್ಕನ್ನು ನಿಯಂತ್ರಿಸಲಾಗುತ್ತದೆ. ಈ ರಿಮೋಟ್ನಲ್ಲಿಯೇ ಇತರ ಆಯ್ಕೆಗಳಾದ ಕ್ಯಾಮೆರಾನಿಯಂತ್ರಣ ಇತ್ಯಾದಿಗಳಿರುತ್ತವೆ. ವೈರ್ಲೆಸ್ ತರಂಗಗಳ ಮೂಲಕ ರಿಮೋಟ್ ಕಳಿಸುವ ಸಂದೇಶಗಳು ಡ್ರೋನನ್ನು ತಲಪುತ್ತವೆ. ಅದರಲ್ಲಿರುವ ಪುಟ್ಟ ಬ್ಯಾಟರಿಯ ಮೂಲಕ ಇದು ಕಾರ್ಯನಿರ್ವಹಿಸುವುದರಿಂದ ಹಾರಾಟದ ಸಮಯವು ಪರಿಮಿತವಾಗಿರುತ್ತವೆ. ಬ್ಯಾಟರಿ ಮುಗಿದಾಗ ಭೂಮಿಗಿಳಿದು ಬದಲಿಸಿಕೊಂಡು ಮತ್ತೆ ಮೇಲೇರಬೇಕಾಗುತ್ತದೆ. ಜಿಪಿಎಸ್ ಮೂಲಕ ತಾನು ಸಾಗಬೇಕಾದ ದಾರಿಯನ್ನು ಕಂಡುಕೊಳ್ಳುವ ಹಾಗೂ ಸಾಗಿದ ದಾರಿಯನ್ನು ನೆನಪಿಟ್ಟು ಮರಳುವ ಡ್ರೋನ್ಗಳೂ ಇವೆ. ಎದುರು ಬೆಟ್ಟ, ಕಟ್ಟಡಗಳು ಅಡ್ಡ ಬಂದಲ್ಲಿ ಅವನ್ನು ತಪ್ಪಿಸಿಕೊಂಡು ಹೋಗುವುದು, ಮರಳಿ ಬರಲು ಬೇಕಾದ ಬ್ಯಾಟರಿ ಉಳಿಸಿಕೊಂಡು ಚಾರ್ಜ್ ಬೇಕಾದಾಗ ಮರಳಿ ಬರುವಂತಹವೂ ಇವೆ.
ಈ ಎಲ್ಲಾ ಪ್ರಯೋಜನಗಳ ಜೊತೆಗೆ ಡ್ರೋನ್ಗಳ ಬಳಕೆಯನ್ನು ಸರಿಯಾಗಿ ನಿಯಂತ್ರಿಸುವ ನಿಯಮಗಳು ಬರಬೇಕಾಗಿವೆ. ಇಲ್ಲವಾದಲ್ಲಿ ಇದು ಸುರಕ್ಷತೆಗೆ ದೊಡ್ಡ ಸವಾಲನ್ನು ತಂದೊಡ್ಡಲಿದೆ.