ಬಸಳೆಸೊಪ್ಪಿನ ಪಲ್ಯ

ಈ ಬಾರಿ ಗಿರೀಶ್ ಮನೆಗೆ ಬಂದಾಗ, ’ಮನೆಯಲ್ಲೇ ಆಗಿದ್ದು’ ಎಂದು ಕೆಂಪುದಂಟಿನ ಬಸಳೆ ತಂದು ಕೊಟ್ಟ. ಕೆಂಪು ಬಣ್ಣದ ದಪ್ಪದಪ್ಪ ದಂಟಿನ ತಾಜಾ ಹಸಿರುಎಲೆಗಳ ಈ ಬಸಳೆ ನನ್ನ ಹಿತ್ತಲಲ್ಲಿ ಈ ಮೊದಲೊಮ್ಮೆ ಇತ್ತು. ಪ್ರತಿವ?ವೂ ನಿರ್ವಹಣೆ ಚೆನ್ನಾಗಿದ್ದಲ್ಲಿ ಮಾತ್ರ ಬಸಳೆಯಂತಹ ಸೊಪ್ಪು ತರಕಾರಿಗಳನ್ನು ಉಳಿಸಿಕೊಳ್ಳಬಹುದು. ನಿರ್ವಹಣೆ ಮಾಡುವುದು ಹೇಗೆಂದರೆ –
ವ?ಕ್ಕೊಮ್ಮೆ ಬುಡ ಬದಲಾಯಿಸುತ್ತಿರಬೇಕು. ಹೊಸ ಜಾಗದಲ್ಲಿ ನೆಟ್ಟರೆ ಉತ್ತಮ. ಜಾಗ ಇಲ್ಲದಿದ್ದರೆ ಅದೇ ಜಾಗದಲ್ಲಿ ಹೊಸ ಮಣ್ಣು ತುಂಬಿಸಿ, ಬಸಳೆಬಳ್ಳಿಗಳನ್ನು ನೆಟ್ಟು, ಸೊಪ್ಪು, ಗೊಬ್ಬರ, ಬೂದಿ, ನೀರು ಹಾಗೂ ಹಬ್ಬಿ ಹರಡಲು ಸೂಕ್ತವಾದ ಚಪ್ಪರದ ಹೊದಿಕೆಯನ್ನೂ ಹೊಂದಿಸಿಬಿಟ್ಟರೆ, ಬಸಳೆ ಬಲು ಸೊಗಸಾದ ಹಿತ್ತಲಬೆಳೆ.
ಕಡುಬೇಸಿಗೆಯಲ್ಲಿ ಸಿಕ್ಕಿದ ಈ ಕೆಂಪುಬಸಳೆಯನ್ನು ಬಿಡಬಾರದು ಎಂದುಕೊಂಡು ನೆರಳಿನ ಆಸರೆಯಲ್ಲಿ ಪ್ರತ್ಯೇಕವಾಗಿ ಒಂದು ಬಕೆಟ್ ತುಂಬ ಮಣ್ಣು ತುಂಬಿ, ಎರಡು ಕುಡಿಗಳನ್ನು ಊರಿದ್ದೂ ಆಯಿತು.
ಒಂದು ವಾರ ಬಿಟ್ಟು ಚೆನ್ನಪ್ಪ ಬಂದ, “ಇದೆಲ್ಲಿಂದ ಬಂತು ಕೆಂಪು ಬಸಳೆ?”
“ಇದು ಜೀವ ಕೂಡೀತೋ ಹೇಗೆ?”
“ಓಹೋ.. ಕೂಡೀತು. ಈಗ ಇಲ್ಲೇ ಇರಲಿ, ಆನಂತರ ಚಪ್ಪರದಲ್ಲಿ ನೆಟ್ಟುಬಿಡುವ…” ಎಂದ ಚೆನ್ನಪ್ಪ.
“ಈಗ ಚಪ್ಪರದಲ್ಲಿರುವ ಬಸಳೆಯೂ ಹಳತಾಯಿತು. ಕೆಂಪು, ಹಸಿರು ಎರಡೂ ಬಣ್ಣದ್ದು ಒಂದೇ ಚಪ್ಪರದಲ್ಲಿ ಆದೀತಲ್ಲ.”
“ಆದೀತು, ಅದೇನೂ ತೊಂದರೆಯಿಲ್ಲ.”
ಮುಂದಿನ ಹತ್ತಾರು ದಿನಗಳಲ್ಲಿ ನನ್ನ ಹಳೆಯ ಬಸಳೆ ಚಪ್ಪರ ನಿರ್ನಾಮವಾಗಿ ಆ ಸ್ಥಾನದಲ್ಲಿ ಹೊಸ ಕೆಂಪು ಮಣ್ಣು ಬಿದ್ದು, ಎರಡು ಗೂಟ ಊರಿ ಹೊಸದಾದ ಬಸಳೆಕುಡಿಗಳನ್ನು ನೆಟ್ಟಿದ್ದಾಯ್ತು. ದಿನವೂ ಧಾರಾಳ ನೀರು ಬೀಳುತ್ತಿದ್ದಂತೆ ಬಸಳೆ ಮೇಲೇರಿತು.
*****
“ಅಮ್ಮ, ನಾವು ಮುಂದಿನವಾರ ಊರಿಗೆ ಬರುವವರಿದ್ದೇವೆ.” ಮಗನ ಕರೆ ಬಂದಿತು.
“ಆಯ್ತು, ಗೇರುಹಣ್ಣು, ಹಲಸಿನಹಣ್ಣು, ಮಾವಿನಹಣ್ಣು, ಚಿಕ್ಕೂ, ಪೇರಳೆ, ಪಪ್ಪಾಯ…”
“ಪೈನಾಪಲ್ ಇಲ್ವಾ?”
“ಕೊಯ್ದು ಇಟ್ಟಿದ್ದು ಹಣ್ಣಾಗಿದೆಯಲ್ಲ, ನೀನು ಬರುವತನಕ ಉಳಿಯುತ್ತದೆಯೋ ಇಲ್ಲವೋ…”
“ಅದೆಲ್ಲ ನನಗೆ ಗೊತ್ತಿಲ್ಲ, ತಿನ್ನಲಿಕ್ಕೆ ಬೇಕಲ್ಲ.”
“ಆಯ್ತಪ್ಪಾ ಆಯ್ತು, ಅದನ್ನು ಹಾಗೇ ಜಾಗ್ರತೆಯಲ್ಲಿ ಇಡೋಣ…”
ಮಗ ಸೊಸೆ ಬಂದಿದ್ದಾಯ್ತು. ಪಟ್ಟಣದ ಸೊಸೆ ಬರುತ್ತಾಳೆ ಎಂದು ಪೇಟೆಯಿಂದ ತರಕಾರಿ ಸಂತೆಯೇ ಮನೆಗೆ ಬಂದಿತ್ತು! ಎಲ್ಲ ಮಾಮೂಲಿನ ತರಕಾರಿಗಳು. ಟೊಮೆಟೋ, ಕೊತ್ತಂಬರಿಸೊಪ್ಪು, ಕ್ಯಾರೆಟ್, ಬೀನ್ಸ್….

ಇವೆಲ್ಲ ನಗರವಾಸಿಗಳು ದಿನವೂ ತಿನ್ನುವ ತರಕಾರಿಗಳು. ಊಟದಲ್ಲಿ ನಮ್ಮ ಊರಿನ ರುಚಿ ಬರಬೇಡವೇ, ಹಾಗಾಗಿ ಒಂದುದಿನ ಬಸಳೆಸೊಪ್ಪಿನ ಪಲ್ಯ ಹಾಗೂ ಮಾವಿನಹಣ್ಣಿನ ಸಾರು ಸಿದ್ಧವಾಯಿತು.
ಬಸಳೆಪಲ್ಯ ತಿನ್ನುತ್ತ ಮಾಡುವ ವಿಧಾನವನ್ನೂ ಕಲಿತಳು ಸೊಸೆ ಮೈತ್ರಿ. ಬಸಳೆಪಲ್ಯ ಮಾಡಿದ್ದು ಹೇಗೆಂದು ನೋಡೋಣ.
೨೫ರಿಂದ ೩೦ ಬಸಳೆಎಲೆಗಳು,
೩-೪ ನೀರುಳ್ಳಿ
೨ ಎಸಳು ಬೆಳ್ಳುಳ್ಳಿ
ಎಲ್ಲವನ್ನೂ ಚಿಕ್ಕದಾಗಿ ಹಚ್ಚಿಟ್ಟುಕೊಳ್ಳಿ.
ಬಾಣಲೆಗೆ ೨ ಚಮಚ ತುಪ್ಪ ಅಥವಾ ಅಡುಗೆಎಣ್ಣೆ ಹಾಕಿ ಸಾಸಿವೆ, ಉದ್ದಿನಬೇಳೆ, ಒಣಮೆಣಸುಗಳ ಒಗ್ಗರಣೆ ಸಿಡಿಯುತ್ತಿದ್ದಾಗ ಪಕ್ಕದಲ್ಲೇ ಒಂದು ಪೊಟ್ಟಣ ಕಂಡಿತು. ಇದೇನು ಎಂದು ಬಿಡಿಸಿದಾಗ ಶುಂಠಿ ಬೆಳ್ಳುಳ್ಳಿ ಪೇಸ್ಟ್ ಎಂದು ತಿಳಿಯಿತು. ಮೈತ್ರಿ ನಿನ್ನೆ ಪುಲಾವ್ ಎಂಬ ಸವಿರುಚಿಯನ್ನು ನಮಗೆ ಉಣಬಡಿಸಿದ್ದಳು. “ಹೌದಲ್ಲ, ಈ ಶುಂಠಿ-ಬೆಳ್ಳುಳ್ಳಿ ಪೇಸ್ಟ್ ಎಲ್ಲಿಂದ ತಂದಿದ್ದೂ…”
“ಅದೂ ಇಲ್ಲೇ ಪಕ್ಕದ ಅಂಗಡಿಯದು” ಎಂದಳು ಮೈತ್ರಿ.
ನಾನು ಎಂತಹ ಹಳ್ಳಿಮುಕ್ಕಿ ಎಂದು ಈಗ ತಿಳಿಯಿತು. ಸುಮ್ಮನೆ ಬೆಳ್ಳುಳ್ಳಿ ಕತ್ತರಿಸಿ ಮಾಡಿ ಇಟ್ಟುಕೊಂಡಿದ್ದು. ಇರಲಿ, ಪ್ಯಾಕೆಟ್ ಶುಂಠಿ-ಬೆಳ್ಳುಳ್ಳಿ ಪೇಸ್ಟ್ ಕೂಡಾ ನಮ್ಮ ಪಲ್ಯಕ್ಕೆ ಬಿತ್ತು. ಅನಂತರ ಕತ್ತರಿಸಿದ ನೀರುಳ್ಳಿ ಹಾಕಿ ಬಾಡಿಸಿ. ರುಚಿಗೆ ಉಪ್ಪು, ಚಿಟಿಕೆ ಅರಸಿಣ ಹಾಕಿ ಬಸಳೆಸೊಪ್ಪನ್ನೂ ಹಾಕಿ ಮುಚ್ಚಿ ಬೇಯಿಸಿ. ನೀರು ಕೂಡಿಸದಿರಿ.
ಒಂದೆರಡು ನಿಮಿಷಗಳ ನಂತರ ಸೌಟಾಡಿಸಿ, ಕಾಯಿತುರಿ ಉದುರಿಸಿ ಮುಚ್ಚಿ ಬೇಯಿಸಿ. ಚಿಕ್ಕ ಉರಿಯಲ್ಲಿರಲಿ. ಸೊಪ್ಪು ಬೆಂದಿದೆಯೋ ಎಂದು ನೋಡಿ ಸ್ಟವ್ ಆರಿಸಿ. ಬಹು ಬೇಗನೆ ಮಾಡಬಹುದಾದ ಬಸಳೆಯ ಪಲ್ಯ ಆರೋಗ್ಯಕ್ಕೂ ಉತ್ತಮ.
ಸಾಮಾನ್ಯವಾಗಿ ಬಸಳೆಯಂತಹ ಸೊಪ್ಪುತರಕಾರಿಗಳು ಆಂಟಿ-ಆಕ್ಸಿಡೆಂಟ್ ಗುಣಧರ್ಮವನ್ನು ಹೊಂದಿರುತ್ತವೆ.
ತಲೆನೋವು, ಜ್ವರ, ಅತಿಸಾರ, ರಕ್ತಹೀನತೆ, ಅಧಿಕ ರಕ್ತದೊತ್ತಡ ಇವೇ ಮೊದಲಾದ ಶಾರೀರಿಕ ತೊಂದರೆಗಳನ್ನು ತಡೆಗಟ್ಟುವಲ್ಲಿ ನಾವು ಸೇವಿಸುವ ಸೊಪ್ಪುಗಳ ಪಾತ್ರ ಮುಖ್ಯವಾಗಿದೆ.
ಹಿತ್ತಿಲಬೆಳೆಯಾದ ಬಸಳೆಗೆ ಕೀಟನಾಶಕ ಅಥವಾ ರಸಗೊಬ್ಬರಗಳ ಹಂಗು ಇಲ್ಲ. ಆಗ ತಾನೇ ಕೊಯ್ದ ಸೊಪ್ಪಿನಲ್ಲಿ ಜೀವಸತ್ತ್ವಗಳು ಅಧಿಕವಾಗಿರುತ್ತವೆ. ರುಚಿಕರವಾದ ಕೆಂಪುಬಸಳೆ ಔ?ಧೀಯ ಗುಣಗಳಿಂದ ಸಮೃದ್ಧವಾಗಿದೆ. ಸ್ತ್ರೀ ಬಂಜೆತನ ನಿವಾರಕ. ಖನಿಜಾಂಶಗಳಿಂದ ಕೂಡಿದ ಬಸಳೆ ದೈಹಿಕ ದುರ್ಬಲತೆಯನ್ನೂ ಹೋಗಲಾಡಿಸುವುದು.
Basella rubra ಎಂಬ ಸಸ್ಯಶಾಸ್ತ್ರೀಯ ಹೆಸರನ್ನು ಹೊಂದಿರುವ ಕೆಂಪುಬಸಳೆಯನ್ನು ಮೂತ್ರನಾಳದ ಸೋಂಕುರೋಗ, ಅದರಲ್ಲೂ ಲೈಂಗಿಕರೋಗಗಳಿಗೆ ಪಾರಂಪರಿಕ ಔ?ಧಿಯಾಗಿ ಬಾಂಗ್ಲಾದೇಶೀಯರು ಬಳಸುತ್ತಾರಂತೆ.
ಆಧುನಿಕ ವೈದ್ಯಕೀಯ ವಿಜ್ಞಾನವೂ ಬಸಳೆಯಲ್ಲಿ ಹುಣ್ಣು ಪ್ರತಿಬಂಧಕಶಕ್ತಿ ಇರುವುದನ್ನು ಕಂಡುಹಿಡಿದಿದೆ.
ಬಸಳೆಯ ಸೇವನೆಯಿಂದ ಆರೋಗ್ಯಕರ ಜೀವನ ನಮ್ಮದಾಗಲಿ.